الاثنين، ١٨ أغسطس ٢٠٠٨

ســـــيماعـــين

سِماعين ابن الجيران
ابن خالتي أم حنان
ماشي مشمرلي فكمامه
لجل مالعضلات تبان
سِماعين دا واد شديد
أي أمر يخلصوهلك ..
واد بأه يفوت في الحديد
وام سماعين ست أميرة وطيبة
وبلكونتها بردو منّا قريبة
ان حزننا تسمع صواتها معانا
وان فرحنا يسبقها صواني كحك ......
............ومعاه غريبة
سُمعه دا حكايته حكاية
لو انت فاضي.. هحكيهالك مالبداية
فتحت عيني لقيت عينه على شباكي ما بتغيب
شمسة نورها عمرو ماكان له نهاية
كنا ننزل... نلعب الأولى بطوبة
كان يسيبني أغلبه ...ولا بتش مغلوبة
لجل مايشوفني أضحك
قال ايه أنا شاطرة
وافضل ألعب معاه هو ...
مش مع حد من برة
كبرت اللعبة معانا ومرت سنين
وأنا وحدي ألعب يوماتي مع اسماعين
كان غانيني عن صحابي وعن جيراني
معاه وبس كنت بعرف أنا مين
أنا بسمة ... لما يقوللي يا بسمتي
وانا جنة ...لما يقول دي جنتي
ملاك سماه ...لما سماني ملاكي
أما هو فكان لي حياتي ودنيتي
لو حكيتلك عن حنانه تقول أبوية
وللا خوفه من عيون الناس عليه
وأما يتزربن سعات زي أخوية
لو حد سلم وايديه لمست ايديَّه
مهما زعل مني وزعق عاللي حصل
عمرو ما يخاصمني أبدا مهما حصل
يقوللي انتي منّي وانتي ليّه
من حبي ليكي وشوقي ليكي
بخاف من كل واحد ...حواليكي
نفسي أفتح لك فقلبي حتة ليكي
نفسي أخبيكي ... جواه أوي
نفسي اني لما حتى أناديكي
تسمعي صوت حبي ... القوي
سُمعه أهو اتخرج من حقوق
زيو زي شباب ...كتير أوي
لكن حنانه وللا زوقه ما في زوق
أصله حنين عليه ... حنان قوي
يومها قاللي يابت هروح لابوكي
وقوللو يابا أنا شاري ...بالأوي
أصل بتك دي فقلبي من سنين
وغلاوتها بتزيد فقلبي بالأوي
يومها عيني غرقتها دموع وفرحة
كأني واخدة شهادة كبيرة ..وللا ناجحة
يومها طِرت فدنيا تانية
وفعينيه تهت مني فأحلى دنيا
خلاص هكون ليك يا سمعه
هفضل معاك
دايبة فهواك
عمري ما تنزلي دمعه
بردو ماعرفتش أقولك
سمعه بالنسبالي ايه
وللا أقولك.....يوم فرحنا تبقى تتعرف عليه!!!

هناك ١٣ تعليقًا:

حبارير يقول...

بردو معرفتش أقوللك سمعة بالنسبالي ايه

وللا اقولك يوم فرحنا تبقى تتعرف عليه

كل ده ياست ولسة ما اأخدش حقه من

الوصف؟!

يعنى بيتين بمليار قصيدة

أكيد هاجي الفرح عشان اتعرف عليه

دكتورة..

الإيقاع بيهرب مني أحيانا..طبعا أنا مش دارس زجل كويس,لكن أغلب ظني أن الزجل يتماشى أيضا مع بحور الشعر العربي(يا مجبل عالصعيد)

بصي الهيئة العامة للكتاب (أزجال بيرم التونسي-دراسة فنية-يسري العزب)

طبعة1982سعر جنيهان أكيد هنستفيد منه

وكان عندي أعمال بيرم بس مش لاقيه

حضرتك صاحبة فضل علي كبير أوي
فعلا باشكرك
أكيدهارجع تاني(هبة النيل زي ماء النيل...اللي يشرب منه...)

هبة النيــل يقول...

الصراحة بيرم الوحيد اللي عمري ما قرأتله

لكن الفاجومي عندي كتبه وبقرأله كتير وأيضا الأستااااذ عبد الرحمن الأبنودي

والرااائع صلاح جاهين

وبعدين يا فندم فضل ايه بس العفو

بس سيبك .. نورت الحارة فعلا...

ومبسوطين كلهم من وجودك معانا

شوف دا ما شاء الله تبارك الله اللهم احفظهم يا رب أكتر موقع ممكن تقابله فيه زجالين بالمستوى دا والعدد دا

تحياتي

حبارير يقول...

أستاذة هبة

عذرا..الفاجومي أخاف من سماعه لبعض

ألفاظه وهو زجال خطير طبعا

قرأت الرباعيات ومخالفاته الشرعية مش

كتيرالرباعية بتاعةالحرية في آخرها

بيطلب انه ربنا ميدخلوش الجنة ليه(في

الجنة سور)لأني أخاف الجرأة على ربي هو سبحانه إله وأنا عبد فالأدب لازم وواجب والتعظيم مع المحبة هما جناحا العبودية وأنا أخاف إن عصيت ربي عذاب يوم عظيم,المعاصي الشخصية ممكن تبدو هينة لكن التى في ذات الله هنا أقف ولا أتعدى أبدا حدوح كوني مخلوق وعبد

الأبنودي عندي له شريطا حراجي الجط

وأحب اسمع يامنة أوي

نفسي تقرئي في علم العروضخاصة كتاب اللباب في العروض والقافية المقرر على ثانوي أزهري ومعاهد القراءات
هتكون نقلة كبيرة

عفوا
لم أفهم تعليق حضرتك(مذيع أو محاور)
عروستي!!

Unknown يقول...

بصى انا كتبت شعر مدح وغزل فى سماعيل

بس الكمبيوتر بتاعى مبروك والحاجات المبروكة لما بتعوز تعمل حاجة بتعملها بمزاجها

عشان كدة هو طفى لوحدة

وطبعا انا مش فاكر الشعر اللى انا كتبتة

الخلاصة

يا دكتورة

الروح اللى جوة الشعر هى اللى استفزت قلمى انة يكتب روح الحارة

روح سيماعيل والحارة والجدعنة والاصل

روح كدة محتاجين ناخد منها معلقتين كل يوم الصبح

عشان نقدر نتواصل مع بعض

انا من رايى ان الشعر اى كان نوعة

عامى فصحى زجل نثر او حتى شعر حلمنتيشى

لازم يتخلى وفورا من الاوزان والقوافى والبحور

لازم الشعر يكون جواة عاطفة وبس

دى اول حاجة نهتم بيها

والباقى يجى بعدها


تحياتى

للدكتور هبة

ولسوماعيل

هبة النيــل يقول...

هههههههههههه

ماهو بننقي اللي نسمعه منهم يا فندم بردو

مش كل اللي يتكتب مسلم به

يامنة رووووعة للأبنودي



بالنسبة للمذيع علشان حضرتك ما شاء الله عندك قدرة على الحوار ربط الردود ببعضها وجذب انتباه القاريء

يعني كدا

تحياتي

هبة النيــل يقول...

أخي الكريم اللي فاهم كل حاجة

هستناك تجمع تاني احسن سماعين يزعل كدا

منور الدنيا وفينك من زمان يا فندم

وحتى على مدونتك مش بترد على الردود

تحياتي

انسانةعادية فى عالم مش عادى يقول...

تسلم ايديك ياهبة الزجل حلو اوى وبجد موهبتك جميلة جدا وانا طبعا مش هقدر اتكلم ولا اعلق على اى حاجة لانى مش بعرف بصراحة غير انى احس الكلام اللى مكتوب وحسيته جدا وشكلى بئا اخطف من اسماعيل هههههههههههه

هبة النيــل يقول...

الجميلة إنسانة عادية

ربنا يكرمك ومبروك عليكي اسماعين

محبش آخد حاجة حد بصلي فيها هههههههههههه

انسانةعادية فى عالم مش عادى يقول...

ههههههههه لا يادكتورة شكرا والله الف مبروك عليكى انتى ياجميل
بجد ربنا يكرمك مدونتك لذيذة جدا وبحس فيها فعلا باخلاق ولاد البلد اللى للاسف اختفت فى زماننا ده

هبة النيــل يقول...

ربما لأني عايشة في الحارة بروحي

وبتمنى يرجع شبابنا زي ولاد البلد زمان

يخاف على جارته وبنت حتته وتبأه زي اخته

ولو حبها يبأه يا هناها وسعدها

منورة يا قمرة

حبارير يقول...

أنا عايشة ف الحارة بروحي

وشعور إنسان

ما بخافش أصحى على جروحي

ما انا لي جيران

وشباب حارتنا شباب راجل

شهم ومجدع

في وقت حاجة القاه نازل

يشفع... ينفع

يخاف علينا....وحوالينا

ونحس أمان

ياسلام يا آية...لو ب ايدينا

ترجع يا زمان

****

يا داخل بين آية وهبة

وقعتك هتبقى مهببة

ما شاء الله اطلع انا منها بأه

الأخلاق الطيبة بتاعة زمان ممكن ترجع
بس مش بالأمنيات

بالعمل والنيات

لازم نجتهد في تنبيه الناس وننصحهم قدر الإمكان..على أد ما نقدر وأكيد هنلاقي نتيجة

وقل اعملوا فسيرى الله عملكم

يارب شبابنا يرجع أحسن من زمان

هبة النيــل يقول...

أولا ماشاء الله

أستاذ زجل يا فندم

ثانيا فعلا مش بالأمنيات

والله كلي أمل يرجع ولاد البلد زي زمان

ربنا ييسر الخير

Sameh Ezzat - (خواطر خاطر) يقول...

يا بختك يا عم اسماعين .. بس دلوقتي اسمياعين ده زمانه متجوز ومعاه دسته يعني انسي بقا الماضئ بدل ما تخربيها عليه وعليكي

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل