الأربعاء، 28 أبريل، 2010

أيام زمان

كان نفسي أعيش ايام زمان

وملاية لف تلفني

وعنيّة م البرقع تبان

وعيال حارتنا

رجالة مجدع بالأوي

صاينين بناتها... وسعات

يتخانقوا علشانهم كمان

وبيتنا رغم إنه زحام

تلاقيه تراوة.. م الحنان

صحيح ماوصلوش كهربا

لكنه حتى فـ عز طوبة...

تلاقيك مدفيك الأمان

بلاطه متغطي بـ كليم

ناموسيّة على عمود السرير

واللمبة جاز

نورها ملعلع م الإزاز

يقلق منامنا ديك ينادي للأدان

والفجر أبوية يلحقه فـ جامع صغير

ع الإمة .. مع عمي و جدي كمان

وساعة العصاري...

نتلم في الصالة الكبيرة

حبة كاسات صغيرين...

نملاها شاي

وعيون تطل م المشربية

على حارة دوشة وضيقة

ونلاقي خالي من بعيد....

لامم ولاده معاه وجاي

تلعب عيالنا فقلب حوش بيتنا الكبير

كورة شراب

وجيراننا خالتي وعمتي

نلاقيهم ساعة المغربية

بيدقوا باب

والصحبة تجمعنا سوا

لحد العشا

وبعد الصلا

ولاحس جوا البيت ولا

حس حتى للهوا

والحارة الدوشة تصير

سكن السكون

والفجر يشرق يوم جديد

والحب فايض م القلوب

طاير وطايل السحاب

قلوب "رقاق" ماهيش حديد

يسكنها حب الخير لها

وللناس كمان..

من حولها..

الله على الدنيا زمان..

كان نفسي أعيش الدنيا دي..

كان نفسي أعيش ايام زمان...

السبت، 17 أبريل، 2010

كل شيء كان فـ انتظارك

.
.
كل شيء كان فـ انتظارك
مش هقولك ان روحي مشتقالك
مش هقولك أد ايه
كنت بتمنى وصالك
مش هقولك ان قلبي
كان بينبضلك بدالك
بس اقولك.....
كل شيء كان فـ انتظارك

كل ركن فالعش اللي جمعنا ليالي
كل حرف كتبته يوم وانت قبالي
كل نغمة واحنا سوا سمعتهالي
كل دول كانوا فـ انتظارك

حتى لو قلت لشفايفي اتبسمي
حتى لو قلت لأفكاري...
طيري واحلمي
حتى لو فكرت أحلم...
بحاجة برّا عن خيالك
قلبي هيرفض أي شيء غير انتظارك
كل شيء كان ولسه فـ انتظارك

من وحي ذكرى

وفجأة لقيت صوت ذكرى
جاي من بعيد و ناداني
وتتسائل عقول فكري
"وهي تكون فكراني؟؟"
وفجأة ألاقيها دي حقيقة
زاينة عيوني قدامي
وأتعجب..
تكونش كمان سمعاني!!
أتاري صوت ندا روحي
دا عرّفها بعنواني
وشوق العين فضح قلبي
ورغم الصمت.. فهماني
وسهم الشوق رجع صابها
وأمرها تعودلي من تاني !!!!
من وحي ذكرى

الجمعة، 26 مارس، 2010

ولما الحب ناداني

تأثرا بالقصيدة الرقيقة
.
ولما الحب ناداني
وجنية في بحر العشق عشقاني
بتبعت للقلوب نسمة
بحنية .. بلاقيها ... لمساني
وموجة عشق تتمايل
وتتحايل ..
أخطي فـ بحرها خطوة..
وعلى سهوة..
ألاقيني..
في وسط البحر ..
ومهما حاولت أعود تاني
مابقدرشي أسيبِك يوم يا جنيّة
عرفت إن انتِ .. سحراني!!!

السبت، 20 مارس، 2010

يوم ما عدتي..

بعد كل ايام غيابِك
ليَّه عدتي
روحي إنتي
عقلي إنتي
يوم فراقِك ..
كان نهاره ليل ضلام
انفجر جوايا صوت..
هش الحمام
اتلملمت غربان تحلَّق
فوق سمايا
لما حست موت فـ روحي
واتوقف نبض القلوب..
ساعة غروب..
ساعة غروب شمسك انتِ من سمايا..
واتبدل فـوق الشجر كل الخضار
جف الورق ..
قلبه اتحرق...
صفاره نار
هو لما الماية تبعد عن قناية
تقدر الزرعة في أرضي ترتوي؟؟
يا حبيبتي
لما عدتي
واتروت أرضي بمية طلتِك
اتخلخلت روح الحياة كل الخلايا
يومها ..رجعلي حلم بكرا...
نوَّر سمايا
يوم ما عدتي...
إنتي شوفتي ...
قلبي عادله النبض عالي
لما شوفتك..
وللا اقولك..
مش هنحكي عاللي كان
المهم انك قبالي
يا حبيبتي
وليّه عدتي !!!!!!

الأحد، 14 مارس، 2010

بلاش ترحل...


سألني يوم السفر:مالكِ؟
.
.
بلاش تسأل

سؤالك عمره ما يغيّر

ولا يرجّع شباب تاني

وبترجاك بلاش ترحل

تقول لقمة وعلشانِك

وأقولك ايه .. هقول تاني

في بعادك لا عمر اللقمة هتشبَّع

ولو حتى تغمسها ..دهب أصفر

أو حتى تغرقها ..يا قوت مرمر

ولا دنيتنا مهما تكون حلاوتها

في غربتنا هتسعدنا ونتمتّع

بلاش ترحل

ولو ترحل

هرجع تاني أترجاك يا ريت ترجع

يا ريت ترجعلي وعيالك

وماتقوليش .. بعيش الغربة علشانِك

لا عمر البعد كان لينا هنا وراحة

ولا الصحرا ورملتها تكون واحة

ولا الورد البلاستيك يوم..

تلاقي عطوره فواحة..

وفي الغربة ..بتجمعلي الورود أشكال

وألوان زاهية ... بتفكرها عجباني

داهو بلاستيك ودا صناعي

وبتفكر هجيلك يوم وأقول "تاني"

وباستنى أشوف منك
"وردة من أراضي بلدي"

تكون زاهية ...تشم عطورها.. سبقاها..

بقولك ايه .. بلاش ترحل..

ولو ترحل هرجع تاني أترجاك..

يا ريت ترجع..وأتمتع ..

بعطر الزهرة من ايدك..

وانا ويّاك....
باترجّاك
بلاش ترحل ...!!!!

الخميس، 4 مارس، 2010

لو ألف ميت مليون طريق


لو ألف ميت مليون طريق
ممكن تضيق
دوّر على فرحة تنور ضحكتك
تطرح زهور في سكتك
فجر بكراتلاقيه ينور ضلمتك
اصبر على كحل الضلام
شمس النهار زيك تنام
تلقى الشروق عم البشر
تلقى الخضارشق الحجر
تلقى النجوم زاينة القمر
قلب السما لون البَحَر
تلقى الصفا بعد الغيام
همس الهدوء بدل الزحام
شجر الزتون ويا الحمام
.
لو ألف ميت مليون طريق
ممكن تضيق
ادعي الكريم..
تلقى الدعا يفتح طريق
تلقى العدو يصبح صديق
تلقى الجفا يصبح وئام
ارمي الهموم واجري أوام...
....من كل ضيق
(ابعد عن الحزن اللي عشش فـ السكك)
فرحة عيونك هتسبق ضحكتك
وتشوف كل الكون جميل
.
.
ردا على أستاذنا حبارير
في زجلاية تحمل نفس الاسم
وما بين الأقواس اقتباس منه كما علمنا
28-5-2009

الأحد، 28 فبراير، 2010

يا شمستي

ماشية ببص لفوق لقيتها مغّيمة
.
وسحابة هادية من تقلها...
.
لونها غامقة معتِّمة
.
قلت افرحي دا باينها ناوية تمطر...
.
وجدودنا قالوا المطرة خيرو...
.
وقفت وسط الشارع أستنى المطر..
.
وجناحي فرداه جمبي ولا ..
.
..........أجدعها طير
.
استنى ساعت ما يجيني الفرح
.
علشان أوام أبدأ أطير
.
وشوية جه حبة هوا جامدين أوي
.
زقوا السحابة بعيد .. بعيد عني أوي
.
وبدال ما الحزن يملاني
.
قلت افرحي دا الشمس هتدفي الهوا
.
ودفاها بردو يعني خير
.
دفاها يعني زهور كتيروأراضي خضرا
.
اوعي يملاكي القنوط
.
واللي ما يتيئن برحمة ربنا (يتيقن)
.
بكرا يكون فـ سجن شيطانه ..
.
مسجون.. أسير
.
شد الهوا ..آسي أوي
.
والسحابة بعدت وبعدت ...كمان كتير..
.
وبنظرة مخلوطة .......ألم وشوق
.
وقفت بصة ...لسمايا فوق ....
.
استنى يمكن...يحين شروق
.
يا شمستي
.
مستنياكي ...مهما طال بيكي الغياب
.
مستنياكي....مهما نورك عني غاب
.
يا شمستي ...
.
مستنياكي وكلي أمل فــ بكرا....تطرح زرعتي
.
وفضلت صابرة ..أدعي ربنا
.
يارب عوض صبري خير
.
واصبرت امبارح ...
وبكرا ....لسه هصبر كمان كتير
.
الأمر كله بإيدين ربنا
.
يا مطرة(ت) سحابة تسقي زرعتي
.
يا إما يصبح بكرا بدعايا ..
.
شمستي...حالها غير!!!!!
2\3\2009

الاثنين، 22 فبراير، 2010

يا عريســــ

ادلع يا عريس يابو لاسة نايلون
جاني عريسي وقال مشتاق
عاوزك كدا من غير دا زواق
تعيشي على مرة وحلوة سواء
أبو لاسة لاسة نايلون
****
راح عند أمي وقال ياماي
بتك عندي هوايا وماي
حنينة تروي ولا الماي
دا بولاسة لاسة نايلون
****
قاله أبوية ومهما تقول
بتي دي غالية ومش هتنول
ولا نظرة .. تكتب على طول
أبو لاسة لاسة نايلون
****
رَد يا عمي أنا هبقى عريس
واكتب لما يهل خميس
ولا هستنى غنا وتهييص
دانا عندي اللاسة نايلون
كتبتها منذ شهور بمناسبة زواج أستاذ حبارير
وتذكرتها بمناسبة خطوبة أختي

الاثنين، 15 فبراير، 2010

دستة مناديل

صحيت على شمسه زاينه شروق
على الديك لما بينادي
وزي العادة أبص لفوق
أصبّح على شعاع هادي
بفرحة أقول نهار نادي
صباحي اليوم دا غير عادي
هجهز نفسي لمعادي
مع الأحباب
ودق الباب
ودقات قلبي من سرعتهاخلته داب
بصوت عالي نده أخوية
دا سي حمدي
واد عمي وجاي يفطرمعانا اليوم
من الفرحة لقيت نفسي
لا قادرة أمشي ولا اقدر اقوم
وأمي عليّه بتنادي
تعالي يا فاطنة ساعديني
حاضر يامّا من عيني
بـ رَبكة أزبّط المنديل....
على راسي
وأتنفس نفس جامد
بحاول أداري احساسي
وجري على أمي في المطبخ
دا طبقين فول
وبيض زبدة
عسل أسود مع طحينة
وجبنة أكيد.. يعني قديمة
وادي الجرجير زاهي خضار
شرايح طماطم ويّا خيار
- تمام يامّاهروح أودي لـ سي حمدي
بضحكة لئيمة عليّه أمي ترد تقول
مفيش غيره اللي هيفطر؟
- يامّا بتكسفيني أكتر
وفي المرواحة طبق واحد
لاجل ماانول كذا نظرة
وانا خدودي تزيد حُمرة
بلمحة عينه لعنيّه
وألاقي لهفته عليّه
تزيد حبة في المرة
اتفضلوا الفطور جاهز
تلملمهم حواليها طبلية
ينادي أخوية متزربن
يا فاطنة ياختي فين العيش
بلؤم أمي ترد تقول"اللي واخد عقلك"
وجري أروح أودي العيش
وبعد الشاي دخلت أوضتي
أتسنط على قوله
وكل كلام بيقوله
عسل سكر
ومن بوئه يزيد أكتر
لقيته خد أخوية على جنب
هجيكو على ندهة المغرب
أنا وابوية...
وانا لا زواق ولا بوية
.......استنيت
الله أكبر
ندهة إمامنا في الجامع
....على المغرب
وصاحبه خبطة الأحباب
على قلبي ...دي مش عالباب
دخلت أمي بتساير مرات عمي
نادوني يا فاطنة الشربات
ودقات قلبي طبول زفة
مافاكر غير فرحته بحمدي
كأنه ماشافش يوم زعلة وللا أهات
مرات عمي هادتني
بـ دستة مناديل
قالتلي هديتك يا جميل
من حمدي
جريت على أوضتي وسريري
وخدت في حضني مناديلي
وعلى صوت كارم محمود
دستة مناديل .. حلوين يا جميل
أستنظر..يحين فرحي
وأنسى معاه ..أوام جرحي
وأنسى الدنيا كلتها
ولا افتكرش إلا زينتها
دا "سي حمدي"

الأحد، 16 نوفمبر، 2008

المعَّلِم

أخواني الأفاضل
---
صورة "المعلِّم" الفكهاني بالحارة المصرية
ذو الجسد الممتليء والشارب الضخم
يرتدي الجلباب و...
لن أطيل عليكم
أترككم مع هذه الزجلاية أو القصة
.
.
المعلِّم .."ابن الحتة"
بجلابية فوقها الجاكتة
يمشي ضارب لي فشنابه
لجل مارضى عنه "حتة"
المعلم راح لابوية
طالب الايد الكريمة
عنده شقة ضاربها بوية
أصله عارف اني قيمة
.
المعلم كان يوماتي
واقف في دكان الساعاتي
لجل ما يلمحلي طلة
أو ينول حتى ابتسامة
.
أما دكان المعلم..
.....دكان كبير
ماليه فاكهة(ت) جناين
تقولش ايه ...دكان وزير
ولما يبعتني ابوية أشتري منه سعات
كان يقف ياسلام عليه ...عمال يوزع ابتسامات
والصغير يعطف عليه
والفقير يديه جنيه
من غير ما يطلب حتى منه ...
ولا يقوله يا عم هات
ولو فمرة لمح واد من الجيران
يرميلي طلة..... يهجم عليه
لحد ما يبانله صاحب
أو يحوشوه الجيران
.
المعلم فاكرني ايه...هيشتريني
دانا بت جدعة وحبيبي اللي شاريني
يديني قلبه .."بس "
وانا احطه فـ عيني
زينة(ت) ايه وأفراح تلالي
دالفرح جوا فــ قلبي ...
والهنا قاللي تعالي
فرحي بحبيبي اللي هاويني
شارياه أنا وهو شاريني
أما المعلم... سيبكوا منه
مهما يعمل ...
عمرو ما يملالي عيني !!!

الأحد، 9 نوفمبر، 2008

يا واد يا عطــوة

الحاج عطــوة .. دا كان زمان ..
الحلو عطــوة .. ابن الجيران
الحلو عطــوة .. جه خطبني ..
وابوية قاله اللي يناســـيبني ..
أديله عيني ويصبح ابــني ..
اداله ابوية دكان صُــــــغيَّــر ..
صحيح محندأ .. بس مناسيبني .......
.
والحلــــــو عطــــــــــوة ..
...راح ماليه حبة(ت) عطـــــــارة .....
.ورُز جايبه بالشــــــــكارة..
رطل حظ ... رطلين شطــــارة ...
مــ الدكـــــان.. الحلو عطــــــوة ..
راح بانيـــلنا دي العمــــــــــــارة ..
.
والحلــــــــو عطـــــــــــوة ..
مش راســــــــــه ناشــــــــــفة..
لاء بيشاركني فــ كل خطــــــوة..
رأيك يا حجـــــة ... وزمان يا حلـــوة ..
الســـــــــــن بردو .. يحكم القولــــــة ....
....مش أي غنــــــــــوة ...
.
وجبنا العيــــــــــــــــــال ...
مرسي وكمــــــــــــــــال .....
وللا البنـــــــــــــــات ..
ســــكر نبـــــــــــــــــات ..
فاطنــــــة وزينــــــــــــــات ...
والحاج عطوة لساه صاينني ..
الحلــــو كله مشــــــتريه ..
ومـــــش حـــارمــــني ...
ولما يحــــب أدلَّع عليــــه ...
يـــــقوللي يا ســـوســــــو ...
علشـــــــان أغـــــــني ..
"يا واد يا عطـــــــوة" ...
.
واحنا النهاردة .. فرح كمـــال ...
ومرسي عنده .. اتنين عيــــال ...
وفاطــــنة قاعدة في الكـــويت ...
وجوزها بردو بنـــالها بيــــــت ...
وزينـــــــات أديلها شــــهر فـــات ...
متــــجوزة وعايشـــة فـ تبــــات ..
البيـــت هيفضى يا حج عطـــوة ..
بعد ما كان ماليه العيـــــال ..
أحسن عشان .. نرجَّع زمان ...
يا بـت حبـــَّة ... نعيد اللي كـان ...
ياللا يا سوسو ... اطرب بصوتك ....
فــ أحلى غنـــــــــوة ...
"يا واد يا عطــــــــــوة" !!!
.
أيتها خدمة

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل