الأحد، 16 نوفمبر 2008

المعَّلِم

أخواني الأفاضل
---
صورة "المعلِّم" الفكهاني بالحارة المصرية
ذو الجسد الممتليء والشارب الضخم
يرتدي الجلباب و...
لن أطيل عليكم
أترككم مع هذه الزجلاية أو القصة
.
.
المعلِّم .."ابن الحتة"
بجلابية فوقها الجاكتة
يمشي ضارب لي فشنابه
لجل مارضى عنه "حتة"
المعلم راح لابوية
طالب الايد الكريمة
عنده شقة ضاربها بوية
أصله عارف اني قيمة
.
المعلم كان يوماتي
واقف في دكان الساعاتي
لجل ما يلمحلي طلة
أو ينول حتى ابتسامة
.
أما دكان المعلم..
.....دكان كبير
ماليه فاكهة(ت) جناين
تقولش ايه ...دكان وزير
ولما يبعتني ابوية أشتري منه سعات
كان يقف ياسلام عليه ...عمال يوزع ابتسامات
والصغير يعطف عليه
والفقير يديه جنيه
من غير ما يطلب حتى منه ...
ولا يقوله يا عم هات
ولو فمرة لمح واد من الجيران
يرميلي طلة..... يهجم عليه
لحد ما يبانله صاحب
أو يحوشوه الجيران
.
المعلم فاكرني ايه...هيشتريني
دانا بت جدعة وحبيبي اللي شاريني
يديني قلبه .."بس "
وانا احطه فـ عيني
زينة(ت) ايه وأفراح تلالي
دالفرح جوا فــ قلبي ...
والهنا قاللي تعالي
فرحي بحبيبي اللي هاويني
شارياه أنا وهو شاريني
أما المعلم... سيبكوا منه
مهما يعمل ...
عمرو ما يملالي عيني !!!

هناك 22 تعليقًا:

romansy يقول...

دا اجمل وصف للمعلم اللى فاكر اللى يشترى بنات الناس بالفلوس
كلامك بسيط جدا وجميل جدا

tarek momen يقول...

يابنتي راجعي نفسك
دي الفاكهة غالية اليومين دول
والمعلم راجل مضمون القبمة الغذائية
هههههه


الصديقة هبة النيل
اجدت رسم الصورة كالمعتاد
اود ان اسال هل تسكنين في حي شعبي يساعدك علي رسم صورك الشعرية

أحــوال الهـوي يقول...

دكتور
حاولت ارد بزجل .... ؟؟؟ لم استطيع لماذا؟؟
اظن الرد لديك
لم يصلني هذه المرة احساس القصيدة

سامحيني هذه المرة اسلوبك فيه تغيير و كانها كتبت بقلم اخر من شخص اخر

تحياتي

حبارير يقول...

صعب عليّ أوي المعلم

وابتسامه والفلوس

اللي راحت في الأونطة

رحت اداريها الوشوش

عينه مكسورة يا عيني

ونأبه جالو على الفشوش

كل ماله راح لحاله

والحبيب نال المراد

****

ربي يهني سعيد بسعيدة

بكرة يشوفله عروسة جديدة

هي الحارة هتخلى بنات

زي الفاكهة

دي تفاحه وديَّت مشمش

وديت جوة القلب تعشش

خوخ كمترى بلح امهات

حتة مانجة كده وشربات

برضه تلاقي فيها الجميز

وبنت تشوفها تحب الدوم

اجري وفلسع ياض يا عليش

أحسن يومك يصبح يوم

****

بس اقولها وكلمة صراحة

المصرية دي ماية الماية

تملا حياتك سعد وراحة

كأن الدنيا دي أنت وهيَّ

أحسن بنت صراحة في العالم

أجمل بنت كمان في الدنيا

لما هاشوفها هاروح أخطفها

واطلب ايدها ف لحظة وثانية

تملا حياتي بهجة وفرحة

امتى راح ارفع عنها الطرحة

امتى نكوت مع بعض في بيتنا

لقمة هنية بملح وزيتنا

آخر اليوم كده تستناني

نعيش في تبات ونبات وحاجات

نعيش بتراضي كده مهما نعاني

تبقى العيشة معاها جميلة

بنت أصول وصفاتها نبيلة

ليه قلبتوا عليا مواجع

قلبي ياناس بيرفرف وائع

لسة هناك ف القلب مطارح

حبهافيها سارح طارح

هبة النيــل يقول...

أخي الكريم رومانسي

ربنا يراضيك والله

بمناسبة إننا في "حارة" عشان دي مدونة "ولاد حارتنا

المفروض أقولك يجبر بخاطرك يا خويا ههههههه

منور

هبة النيــل يقول...

أستاذ طارق مؤمن

بتشرفني يا فندم والله

وضحكت ملء فمي لموضوع "الحارة الشعبية" التي أسكنها

ياريت والله دا حلمي فعلا

لكن عايشة فيها بروحي

لن أخفي عليك

إنني أحيانا عندما يتوفر لي الوقت وأحاول أن أرفه عن نفسي

أستقل أي سيارة "ميكروباس" لأي منطقة شعبية

وأروي روحي بالتمشية هناك

والحياة ضمن أهلها الكرما البسطا

وتلتقط عيني تصرفاتهم وربما تلتقط أذني مفرداتهم

غير أن "الأبيض والأسود" هي أفلامي المفضلة

وخاصة تلك التي كانت تعكس حياة الحارة القديمة

ربما أحيا داخلها لفترة الفيلم

واختزنتها لكي أكتب مثل هذه القصص

سعدت جداااااا لتعليقك دا فعلا

هبة النيــل يقول...

دكتورنا الفاضل أحوال الهوا

أولا وثانيا وعاشرا منور وأسعدني ردك


لكن والله أنا اللي كاتباها لكن منذ سنة تقريبا

وأشعر بها كاملة فعلا

هي كأنها قصة شعرية بسيطة التعبير ليس أكثر

تحكي حكاية بنت "جدعة" ما يلزمهاش الفلوس لكن يلزمها قلب طيب

بس يا فندم والله

منور بردو تاني

هبة النيــل يقول...

استاذ حبارير

أسعدتني أسعدتني أسعدتني

أحــوال الهـوي يقول...

دكتور
و الله صادقه و القصه و المعني بديع و الفكرة وصلت لكن ناقصها حاجة ما تشغليش بالك لو وصلت لها راح اقولك

ده لا ينفي عنها الابداع و الرقي
ماتزعليش مني

تحياتي

خواطر ليست عابرة يقول...

حسيت في الزجل الجميل والممتع ده ان فيه قصة حقيقية وراه

أحييكي عليهم (الزجل والقصة) يا بنت بلدي العزيزة علية قوي

د/ رامي شهاب الدين يقول...

حلوة أوى قطعة الزجل دى

بس أنا حاسس إن الراجل شارى فعلا

وهو للأسف مايعرفشى إلا لغة الفلوس


تحياتى

أحــوال الهـوي يقول...

انت فين يا دكتور

تحياتي

أحــوال الهـوي يقول...

انت فين ده كسل او انشغال

تحياتي

Wael Mostafa يقول...

رغم انى قراتها من حضرتك سابقا بس كل مرة بكتشف انها جميله فعلا

بس المعلم صعبان عليا جدا .. طب تديله فرصه تانيه طيب

ههههههه

ترجعى بالسلامه يا دكتورة وكل سنه وانتى والاسرة بكل خير

ــــــــــ

ابقى طلى علينا فى فخفخينا اختك مستكه عندها مشكله مع فرخه بتعدى الطريق

أحــوال الهـوي يقول...

كل عام و انت بخير يا دكتورة

و كل اسرتك الكريمة بسعادة و فرح

و اتمني لك الحج لبيت الله و المغفرة و الرحمة

تحياتي

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


تحياتى

Che_wildwing يقول...

وحشتنى خربشاتك يادكتورة
معلش انا عارف اني قليل الاصل
بس اعذريني
غصب عني

هبة النيـــــل يقول...

كتور أحوال الهوى

منور الدنيا

اتلبخت خاالص

ادعيلي



تشي

عمرك يابني ما كنت كدا

ربنا يوفقك


خواطر عابرة


أكرمك ربي


د. رامي شهاب الدرين

شاكرة لك تواجدك جدااا

انسان وبس ! يقول...

الكلام جميل فيه من طريقة احمد فؤاد نجم
ابدعتى

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com

أرجوا إرسال مواضيعكم لأختيار الأفضل لنشره العدد القادم
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039

أحــوال الهـوي يقول...

تحياتي لك يا دكتورة

انت اختفيت و ليس لي من اناظرة

تحياتي

assafo anaroze يقول...

مساء السعادة اول مرة ازور مدونتك و حقيقي اعجبني زجلك و شعرك بالعامية المصرية
ايه مالو المعلم ده عنده المال و الجاه و حيسكنك في قصر من قصوره
اما الحبيب فمهما عمل مش حيديكي غير شويات كلام و عواطف مالهاش ثمن في السوق
حقيقي هبة النيل برافو العواطف و الحب مبتباعش ولا تستبدل و لو بمال الدنيا كله
مودتي المتواصلة

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل