الاثنين، ٢٥ أغسطس ٢٠٠٨

محلاك يــواد

الله عليك ياد ياقمر ماحلا عيونك
وللا جمالك يا قمر كحِّل جفونك
الرمش أسمر يا قمر لون الليالي
الضي نوَّر يا قمر والعين تلالي
كل اما قرب يا قمر منك ألاقي
حلاك دا زايد يا قمر وانت قبالي
طول عمري بحلم يا قمر بنظرة منك
أو لمسة منك يا قمر ..أو حتى قربك
فتحت عيوني يا قمر ولقيتني جمبك
والله ما مصدق يا قمر انك قبالي
عسلي عيونك يا ولا والنني أسمر
والدم شربات يا ولا سكر مكرر
د الضحكة منك ياولا بعنيك تنور
أنسى همومي يا ولا وبنسى حالي
رسمت صورتك يا قمر من قبل شوفتك
وكنت بسرح يا قمر كتير فصورتك
إني معاك فوق السحاب واني قابلتك
لقيتك أجمل مالقمر لما عرفتك
وادي حلمي اتحقق يا قمر ماحلا خيالي

هناك ١٢ تعليقًا:

Unknown يقول...

جميلة يا دكتورة

وسهلة وبسيطة

بس فى حاجة عاوز اقولها

انا لما كنت لسة بادى اكتب شعر عامى

كنت كتبت حاجة برضوا قريبة من قصيدتك

واعتمدت على كلمة بطول النص

بس ناس كتير قالولى انها مش بتبقى لطيفة

عملت نفسى اقتنعت برايهم

بس لاحظت حاجة فى اغنية زى اغنية اهواك

لعبد الحليم

اهواك واتمنى لو انساك


برغم انة اعتمد على حرم واحد كا قافية

الا انى محستش فيها بملل بالعكس كانت جميلة


نفس الموضوع فى قصيدتك محسيتش فيها بملل

الا فى مكان او اتنين كان ممكن تستغنى فيهم عن كلمة قمر وكانت هاتبقى احسن

مجرد نقد مش خبير يعنى

تقبلية

بس فى المجمل عجبتنى البساطة اللى فيها

حبارير يقول...

دي تالت مرة أكتب تعليق
بصي امنحه فرصة خطيرة
يااااااااه
فعلا الحب في الله حاجة جميلة أوي ,ربنا يبارك لنا فيك يا دكتورة.تأثرت بها جدا

حبارير يقول...

أستاذة
لي عودة

هبة النيــل يقول...

أخي الكريم

اللي فاهم كل حاجة

طيب ما تقولهوملي المكان أو اتنين دول ينوبك ثواب

لعلمك الخاص نقدك أهم عندي مليون مرة من اللي يقوللي حلوة وخلاص

علشان أتعلم

يعيش الانسان طول عمره يتعلم

واذا تخيل انه عارف كل حاجة...

عليه أن يبتهج ...

فهو بأول طريق الجهل

نورت ومنتظراك تاني تقوللي

هبة النيــل يقول...

أستاذنا الكريم "حبارير"

انتظرت تعليقك على "محلاك يواد"

امنحه فرصة دي في مدونتي الأخرى

أنا أتشرف بتعليق حضرتك طبعا بأي مكان

ومنتظراك تفصيليا كما عودتنا...

شكلك مشغول اليومين دول

انسانةعادية فى عالم مش عادى يقول...

دكتورة هبة تسلم ايديكى ياجيل حلوة اوى الكلمات ربنا يكرمك يارب ويسعدك دايما

حبارير يقول...

سيدتي وأستاذتي الكريمة
ما كنت لأنشغل عنكم إلا لطارئ
سيدتي النت فاصل منذ أيام وأدخل عن طريق المحمول فأشعر أني في النزع
ثم وجدتني وقد احتوتني امنحه فرصة فما أبقت مني لسواها شيئا تخيلي يادكتورة اكتب التعليق ثلاث مرات ولا يرسل وينمحي ويزول حتى تركته وبصراحة ياستي أتمنى تدرسي العروض لأن موهبتك خطيرة وأعجبتني جدا جدا الريشة خطيرة!!!
بعدين المتصفح لا يأتي بالسطر كاملا إلا بشوية مشاوير كدة
عموما أعتذر عن التأخير

هبة النيــل يقول...

أختي الكريمة انسانة عادية

ربنا يكرمك يا قمر

تسلمي

هبة النيــل يقول...

أستاذ حبارير منور الدنيا

والله حاضر هحطها في دماغي وافكر جديا فعلا ربنا يكرمك على التشجيع دا

بجد حضرتك اللي خلتني أهتم بالمدونة كدا

أرق المنى

حبارير يقول...

أنصحك بأي صديقة دار علوم تستعيري منها كتب العروض أو كتاب اللباب في العروض والقافية مقرر على ثانوي أزهري ومعاهد الأزهر
سأنتظر وأرتقب غدا شاعرة لا يشق لها غبار

هبة النيــل يقول...

حاضر يا فندم

جزيل الشكر

وجزاك الله خيرا على النصيحة فعلا

أرق المنى

أحــوال الهـوي يقول...

ان كان القمر ولد ما كنت حبيته
ولا شفت فيه جمال و النبض خبيته
و لاكحل عيوني السهر و نوره رديته
اصل القمر ياقمر قلبي وانا بيته

تحياتي

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل