الجمعة، ٢٩ أغسطس ٢٠٠٨

فانوس رمضان

الله على فانوس رمضان ..
دا بأه جدي....
يجيبهولي فــ آخر شعبان
يصاحبه بوسة على خدي
يا هبهوبة ...يا حبوبة
يا أول مالعيون شافت
يا زاينة العيلة يا أروبة
يا بكرية ...يا شقية
كلمة يعني فــودانكم
أنا جدي .. طاير بيّه
وجري انط انا فحضنه
ادعيله ...
يا رب متحرم منه
ولا تحرمني دي هديّة
ويوم الوقفة نتلملم...
على افطار في بيت العيلة
صحبة دافية ..وجميلة
نسيت أحكيلكو عــالعيلة
ما شاالله العيلة دي كبيرة
بنعمل سفرتين دايما
سفرة فــ أوضة للستات
وغيرها بعيد للرجالة
عشان ناخد بأه راحتنا
ولا حد يسمعنا
مهما الضحك علي مّنا
ومهما صوتنا بأه لالى
تقوللي عمتي "نوجا"..
يا بت حطة ايه فطبقك ..
دا شكلو جميل ...
يعني هجيبو من بره؟؟؟
ما دا صنعت ايديكو يا جميل
ويوم العيد دا بيكون يوم
عادة يا رب ما تقطع ...
ودايما دوم
أروح أصلي في الساحة
وأرجع بردو على جدي
واستنى اللي جاي بعدي
من العيلة
نلاقي الحاجة عمتي نور
تقول تعالوا افطروا عندي
محضره البيض ويّا الفول
بسكوت وكحك ما يمنعشي
هتاكل مهما قعدت تقول
انك حتى متعشي
وندعي ربي ما يقطع لنا عادة
وكل سنة تزيد أكتر ..
محبتنا لبعض بزيادة

هناك ١٧ تعليقًا:

انسانةعادية فى عالم مش عادى يقول...

تسلم ايديكى يادكتورة هبة والله كلام اكتر من جميل وربنا ما يقطعك لك عادة ابدا ياجميل يارب وفعلا مدونتك بحس فيها براحة غريبة جدا وان الدنيا لسه بخير ربنا يكرمك يارب

حبارير يقول...

أضم صوتي لآية
هذه صورة من صور (العالم الموازي) الذكريات السعيدة والتي ينبغي أن نفزع إليها عند مواجهة عوامل الإحباط حولنا
وانظري يا دكتورة كيف انتقل شعور البهجة والسعادة للقارئ
‏(عايزك يا آية تكتبي ذكرياتك الجميلة زي الدكتورة كدة)
أخيرا
سامحيني على التقصير معك وادعي لي عشان مربوك شوية
وبصدد اتخاذ قرار مصيري
أسعدك الله دوما
آمين

حبارير يقول...

التدوينة الأخيرة في مدونة عبقري

تدوينة عبقرية

على فكرة يا دكتورة أنت ما شاء الله

فيما تكتبين

حفظك الله وزادك فهما وعلما آمين

كل عام أنت بخير

السباق إلى الله بدأ

لنحرص أن نكون من الأوائل

أخوك حبارير

هبة النيــل يقول...

أختي الجميلة انسانة عادية

أولا كل سنة وانتي طيبة وبخير يا رب

ثانيا الله يكرمك على الكلام الحلو دا

انتي شايفاها جميلة علشان انتي جدواكي جميل يا حبيبتي

هبة النيــل يقول...

أستاذ حبارير

ربنا ييسرلك الخير يا رب

واسأل الكريم

المجيب القريب السميع العليم

هبة النيــل يقول...

أستاذ حبارير

أولا شكرا جزيلا على تشجيعك

بس والله أحيانا بحس ان الكلام مش موجه ليّه :)

لما بقرأ كلامك تلاقي صباعي شاور عليه وسألتك ...أنا؟؟؟

الكلام دا ليّه أنا؟؟؟

ربنا يكرمك وما يحرمناش من تشجيعك أبدا

حبارير يقول...

أن تحولي لغةالشارع إلى لغة الشاعر

هذه عبقرية (وهو مذهبي في الكتابة)

أن تضعي يدك على أسباب مشكلاتنا

المجتمعية والحضارية في صياغة سهلة لا

تستعصي على القارئ

هذه عبقرية

أول تعليق لي على حضرتك في الإطار الذي

بجوار التدوينة اقرئيه

قلت لك تذكرينني بشخص أحبه وأعظمه

د\أحمد فؤاد باشا عميد كلية علوم

لك عندي رد موسع بس مش دلوقت

المهم لعل الله أجاب دعاءك لي فاستكثري

يا دكتورة من الدعاء لعله يومك الذي

يستجاب لك فيه

تحققت ثلاث نقاط من ستة والحمد لله ثم

الشكر لحضرتك معلش كملي جميلك مع أخيك

واجتهدي في الدعاء والملائكة تردد آمين

ولك بمثل,صدقيني دخلت النت عشان أشكرك

وأبشرك,بتحقق خمسين بالمائة من مرادي

وحسيت أنه ببركة دعائك

ربنا كريم جدا يا دكتورة وعظيم ورحيم

يااااااااااه

الحمد لله كثيرا

وحضرتك إنسانة عظيمة

أيوه أنت أنت

حبارير يقول...

بالمناسبة يل سيدتي

لا أستطيع التعليق على المدونة الأخرى

(عبقري...)

ممكن تجعلين نظام التعليق (صفحة) وتلغي

نظام (النافذة)؟هناك في (عبقري...)

أم ماذا الحل ؟

هل أقوم بإنشاء رابط لأجل التعليق؟

هبة النيــل يقول...

طلباتك أوامر يا فندم

وتم التنفيذ

انسان وبس ! يقول...

مبرووووووووووك الفانوس
وكل سنه وانتى طيبه

هبة النيــل يقول...

انت طيب يا باشا

الله يبارك فيك

منور

أختكم فى الله يقول...

كل سنة وانتى طيبة ربنا يبلغنا رمضان جميعا ان شاء الله

تقبلى مرورى

tarek momen يقول...

ذكرتينا بايام زمان
ياليتها تعود
جزاك الله خيرا ياهبة النيل
بالمناسبة الجهاز كان تعطل و ارسلته للاصلاح وتم والحمد لله
عذرا للتاخير في التعليق

هبة النيــل يقول...

أستاذ طارق

حمدا لله على السلامة

سعيدة جدا بعودتك

وسعيدة أكثر بزيارتك

كل سنة وحضرتك طيب

هبة النيــل يقول...

أختنا في الله

كل سنة وانتي طيبة حبيبتي

أحــوال الهـوي يقول...

انت تمتلكين ادواتك و كلماتك فتفيض باحساسك و ابداعك بكل سهولة علي شاكلة السهل الممتنع


فانوسي هلاله هل .... بينور الضلمة
و يجمع الصحبة...... و يكتر اللمة
بعد الفطار يصحي و تصحي فيه شمعة
و نغني ليه و حوي و تدمع الشمعة


تسلم يداك يا دكتورة

هبة النيــل يقول...

شكرا جزيلا يا دكتور على الإطراء

ولو إني حساه كتير عليّه

"تدمع الشمعة"

معنى رااائع

والله العظيم أمس انقطعت الكهرباء

واضطررنا لإشعال بعض الشموع

وأنا أثبتها

جاءني نفس الهاتف

حين نظرت إليها رأيتها "تدمع"

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل