الجمعة، ١٢ سبتمبر ٢٠٠٨

مش هسامحك


مش هسامحك ...
ولا قلبي فـ يوم يسامح ...
هجرك وجرحك
كل منايا كان زمان ..
لو كلمة حلوة..
أو حتى غنوة..
طمني وتملاني الأمان
أوبسمة من ضي عنيك
أو اشارة...
إشارة حتى من إيديك
تقوللي عاوزك ... مشتريك
فين لما كان ...
قلبي زمان
ينده عليك..
ويلقى منك ...
نشفان فــ ردك ..
وقسوة طلة من عنيك ...
دلوقتي أقولك..
خلص اللي كان بيّا زمان
مافضلش غير حتة فــ قلبي تليق عليك..
سوادها منك ...
من كحل قلبك...
مش هسامحك

هناك ١١ تعليقًا:

tarek momen يقول...

جميلة و معبرة
لي ملاحظة فقط علي تعبير
"نشفان" في ردك
وقعها غريب
هل يمكن التعبير بكلمة اخري

هبة النيــل يقول...

أستاذ طارق ربنا يكرمك

هههههههههه

مش عارفة والله أنا بقولها عادي يعني أقصد في الكلام العادي

"ردك ناشف - رده كان ناشف"

فيه نشفان هههههههه

مش عارفة هدور حاضر على كلمة تانية

بس يمكن علشان "أنا أقاليم يا فندم"

فلاحين يعني يا بيه ههههههه

أسعدني وجودك

أرق المنى

tamer.sala7 يقول...

ربنا يعوض عليكي عوض الصابرين

ولا يهمك بكرة حجوزك سيد سيده

هو الخسران

هبة النيــل يقول...

مين دا يا حج؟؟؟ :)

ألا يوجد مكان للخيال؟؟؟

أستاذ تامر باشا

أولا منور

ثانيا

ما أكتبه خيال

وإن نزلت تحتها بشوية هتلاقيني كاتبة لاسماعيل

يعني خيال في خيال يا فندم

منور

وائل مصطفى يقول...

أأقول الحق ولا ابن عمه ؟؟؟

انا عارف ان حضرتك مش هتزعلى منى بس الزجل دة يمكن من اضعف ما كتبتى حضرتك ودى وجهه نظرى الخاصه اللى لا يعتد بها طبعا لكن اول ما شفت اسم القصيدة فى زعتر وحاجه جديدة دخلت جرررى وانا بمنى نفسي بوجبه دسمه لقيت المحتوى والفكرة عاديه والاسلوب ايضا عادى ان لم يكن مستهلك الالفاظ

يمكن الجزئيه دى

مافضلش غير حتة فــ قلبي تليق عليك..
سوادها منك ...
من كحل قلبك...
مش هسامحك

دة اجمل ما فى القصيدة

.......................

ابن عمه

وواوو تحفه رائع ابداع مش مصدق ودانى .. الخ

هبة النيــل يقول...

هههههههههههههههههه

لا والله ما زعلتش بالعكس

بص هو أنا تقريبا الغم مش بيليق عليّه

هههههههههههههه

أنا مش همسح التعليق دا لأنه عاجبني

لكن مش هنزل التاني يا فندم

باشمهندس وائل أنت خير أخ والله فعلا

القصة كلها ببساطة إنك قرأت الزجل بعينيك مش بقلبك

لو عايش حاجة مشابهة هتحسها

دا غير الخيال 100 %

بتبأه داخل وعارف إنه خيال ومستعد لكدا

دا اللي بيخليك في الحجات التانية بتنبسط أكتر

لو حستها هتحبها

لكن بردو أقولك عندك حق كتبتها في 10 دقايق أو أقل

يدوب زمن مالكي بورد اتحركت بين صوابعي يعني مشغلتش مخي جامد فيها وصور وبتاع

كلمتين في زوري وقلتهم يعني

اعتبرها فضفضة يا باشمهندس

منور والله العظيم

ضحكتني ومكنتش عارفة اضحك

:)

ربنا يراضيك ويرضى عنك يااارب

غير معرف يقول...

مش عارفة يارورو

بس والله انا حابه الزجل ده جدا

يمكن عشان حاساه اوي

واتأثرت بيه

مش مجاملة والله

بس بجد ده اللي حسيته

حاسة انك كتبتي حاجه كان نفسي اكتبها

وعندك حق في ردك علي البشمهندس طبعا

الزجل اللي بتحسيه هوه اللي بتعجبي بيه حتي لو كان بسيط ومفيهوش صور جمالية كتير

فاهمة مني حاجه

انتي عارفاني بتكلم بطبيعتي

هههههههه

هبة النيــل يقول...

ما هيه الفكرة إنه أحيانا الواحد لما يحس بالكلمات يحكم على الزجل من المنطلق دا

وأحيانا لو لا تعني الكلمات عنده شيئا ربما لا يشعر به

بس اللي متفقة مع الباشمهندس فيه فعلا

إنه مش على المستوى المرجو حقيقي

ولكل حصان كبوة يا باشمهندس

:)

أحــوال الهـوي يقول...

انا الخسران لو حبك هجرني يوم
و الوم نفسي و اسفي بالندامه يدوم
دي طلة عينك بالنظرة ضياها نجوم
و ان سامح رضاك قلبي
راح اسجد واصلي و اصوم

و اسامحك

هبة النيــل يقول...

الله

تسلم ايدك يا دكتور

بتنورني والله

أحــوال الهـوي يقول...

الله علي احساسك اللي خلاني ارتجل الرد
ولاننا بنكتب احاسسنا و بنصيغه بمفهمنا فلا بد ان يدغدغ مشاعر الآخرين تماما كما فعلت خاطرتك بي

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل