السبت، ٢٠ مارس ٢٠١٠

يوم ما عدتي..

بعد كل ايام غيابِك
ليَّه عدتي
روحي إنتي
عقلي إنتي
يوم فراقِك ..
كان نهاره ليل ضلام
انفجر جوايا صوت..
هش الحمام
اتلملمت غربان تحلَّق
فوق سمايا
لما حست موت فـ روحي
واتوقف نبض القلوب..
ساعة غروب..
ساعة غروب شمسك انتِ من سمايا..
واتبدل فـوق الشجر كل الخضار
جف الورق ..
قلبه اتحرق...
صفاره نار
هو لما الماية تبعد عن قناية
تقدر الزرعة في أرضي ترتوي؟؟
يا حبيبتي
لما عدتي
واتروت أرضي بمية طلتِك
اتخلخلت روح الحياة كل الخلايا
يومها ..رجعلي حلم بكرا...
نوَّر سمايا
يوم ما عدتي...
إنتي شوفتي ...
قلبي عادله النبض عالي
لما شوفتك..
وللا اقولك..
مش هنحكي عاللي كان
المهم انك قبالي
يا حبيبتي
وليّه عدتي !!!!!!

هناك ٨ تعليقات:

Haytham Alsayes يقول...

السلام عليكم
مرة تانية معاكي ياستاذة هبة

بجد احساس دافىء وجميل بس كن باسأل ايه حكاية النبات المروى النهاردة فعلا النبات في حكمة كبيرة من ربنا النمو الامل الايجابية
شكرا علي اختيار الرموز الجيدة

وتحياتي لكى

romansy يقول...

طبعا انا مش اول مره ازور مدونتك
بس متعرفيش سعادتى اد ايه لما زورتها من تانى
بعد ما لينكاتها ضاعت من عندى

المهم ليا عدتى
يا حبيبتى
تفرح الدنيا برجوعك
يوم ما عدتى

عفوا أنا أميرة يقول...

فعلا أسلوبك ممزوج بريحة مصر بنت بلد بحق وحقيقى أسلوبك مصري مريح، فعلا هبة النيل لازم تبدع هذا الابداع الجميل.

هبة النيـــــل يقول...

أستاذ هيثم

ربنا يكرمك، مانا بقولك تخصصي نبات وراثة :) فيظهر التخصص طاغي :))

والله صدقا باشعر إن النبات دا من أرق الكائنات الحية على الإطلاق.

أرق المنى

هبة النيـــــل يقول...

أستاذ رومانسي

ربنا يكرمك

أيوة أنا فاكرة طبعا :)

وسعيدة بزيارة حضرتك جدا

هبة النيـــــل يقول...

الأميرة سلمى

الزميلة والصديقة العزيزة جدا جدا

مين يشكر في العروسة :))

فعلا متشكرة ليكِ على الرد "الأميري".

أحببتكِ :)

القمرالباكي يقول...

السلام عليكم
اد ايه جميله كلماتك مش في دي بس فاكتر من بوست لان مريت ع كذا واحد
مبدعه بجد
ع فكره انا خريجه علوم برضه
دومتي بخير

هبة النيـــــل يقول...

أهلا وسهلا

ولمَ تبكي أيها القمرُ؟؟

شرفتُ بكِ

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل