الأربعاء، 28 أبريل 2010

أيام زمان

كان نفسي أعيش ايام زمان

وملاية لف تلفني

وعنيّة م البرقع تبان

وعيال حارتنا

رجالة مجدع بالأوي

صاينين بناتها... وسعات

يتخانقوا علشانهم كمان

وبيتنا رغم إنه زحام

تلاقيه تراوة.. م الحنان

صحيح ماوصلوش كهربا

لكنه حتى فـ عز طوبة...

تلاقيك مدفيك الأمان

بلاطه متغطي بـ كليم

ناموسيّة على عمود السرير

واللمبة جاز

نورها ملعلع م الإزاز

يقلق منامنا ديك ينادي للأدان

والفجر أبوية يلحقه فـ جامع صغير

ع الإمة .. مع عمي و جدي كمان

وساعة العصاري...

نتلم في الصالة الكبيرة

حبة كاسات صغيرين...

نملاها شاي

وعيون تطل م المشربية

على حارة دوشة وضيقة

ونلاقي خالي من بعيد....

لامم ولاده معاه وجاي

تلعب عيالنا فقلب حوش بيتنا الكبير

كورة شراب

وجيراننا خالتي وعمتي

نلاقيهم ساعة المغربية

بيدقوا باب

والصحبة تجمعنا سوا

لحد العشا

وبعد الصلا

ولاحس جوا البيت ولا

حس حتى للهوا

والحارة الدوشة تصير

سكن السكون

والفجر يشرق يوم جديد

والحب فايض م القلوب

طاير وطايل السحاب

قلوب "رقاق" ماهيش حديد

يسكنها حب الخير لها

وللناس كمان..

من حولها..

الله على الدنيا زمان..

كان نفسي أعيش الدنيا دي..

كان نفسي أعيش ايام زمان...

هناك 26 تعليقًا:

Haytham Alsayes يقول...

السلام عليكم

استاذتي هبة

فعلا اشعار جميلة جدا

يمكن انا معشتش في حارة ولا اعرف العادات والتقاليد الاصيلة بتاعتهم بس امي حكتلي كتيييييييير جدا ذكرايتها وهي صغيرة عن اخلاق الحارة ولكن دلوقتي طبعا ولا في اخلاق حارة ولا شارع وربنا يكرمنا بالاخلاق دي وترجع تاني

وصفك جميل جدا ياستاذتي كلعادة ودايما اشعارك تعبر عن روح الحارة زمان وربنا يجازيكي خير ويكرمك
ومستني وعدك عن تنمية الذكاءات لو عند حضرتك وقت كافي لذلك


تحياتي ياستاذتي العبقرية

هبة النيـــــل يقول...

وعليكم السلام ورحمة الله وبركاته

والله ولا انا عشت الحارة زمان :)

بس بسمع من جدي

وبتأثر جدا بنجيب محفوظ :)

حاضر من عنيه نوع نوع كدا ان شاء الله :)

نورتني

عفوا أنا أميرة يقول...

ايه الكلام دا والله عيشه حلوه، قلت لإيمان لكن ماسمعتش كلامى كان لازم نجيب منديل بلدى أو برقع بس ماصدقتنيش لازم تقرا الكلام الحلو دا، ربنا يعزك

أحــوال الهـوي يقول...

الله عليكي يا دكتورة
قصيدة تتنفس عبق الماضي ببساطته و اخلاقه بقيمة و ارتباط الناس فيه

صلاة الفجر و تجمع الاهل
الحميمية و التقارب

و لعلك لم تنسي اي شئ في هذه الحقبة من ماضينا و كانك قد عايشتيها

لا اخفي ان سلاسة الكلمات و عمقها و ايضا محتواها اجبروني ان اقراها مرات و مرات

و كيف لا و كاتبتها شاعرة اكن لها كامل الاحترام و التقدير

من تتحدث عن الاخلاق و القيم و ترفع علم الفضيلة دائما في كتابتها لابد ان ننحني لها فخرا و اجلالا

بارك الله فيكي و لكي

تحياتي

أحــوال الهـوي يقول...

رجعت تاني
انهل من عبق الماضي و اتيمم من عصر البركة و روقان البال
عصر القناعة و البساطه

اتحسر علي صلة الرحم التي افتقدناها

دكتورة
لقد احييتي عصر كامل بكلمات تتنفس برائحته

براعة طالما اعجبت بها و حنكة تحسدين عليها

تحياتي

هبة النيـــــل يقول...

الأميرة سلمى

ههههههههههههه

فهمااااني جدااااااا

المنديل بئوية حلمي بجد :)

صحابي الاسكندرانية هيودوني الزنقة ان شاء الله أجيب منديل وملاية لف :)

ولو ملقيتش ملاية هفصلها ههههههه

تسلمي يا سلمى كلك زوق

هبة النيـــــل يقول...

يااااه يا دكتور عصام

كل دااااا

:)

أنا هاخد قلم في نفسي على كدا يا فندم

ربنا يبارك في عمرك على رفع المعنويات دا

NeVeN يقول...

الله عليكى يا دكتور

والله كل اللى قولتيه على لسانى
كأنك دخلتى جوة قلبى

البرقع والمشربية والكليم واللمبة الجاز

وحارة


يااه حاجات قديمة اة بس حلوة اوى اوى

وصف هايل


اول مرة ازورك ومش الاخيرة ابدا


مساءك ورد

well يقول...

كلام جميل يستاهل يتقرى مليون مرة
كلام موزون وكأن نبت بين الحروف
انا هقلب فى مدونتك على بقيت الشعر لانك عندك موهبة الشعر تحياتى

القمرالباكي يقول...

السلام عليكم ورحمه الله وبركاته

ازيك يادكتوره هبه
صباح جميل وجمعه طيبه
بصي مش عارفه اقولك حسيت بايه وانا بقرائها بالنقاء والدفا والموسيقي فالكلام مخلياها تلمس القلب
جمعتي بين الابداع الفني والوصف الرائع لزمن ابيض وتجسيده فمعاني راقيه تظهر اصاله المصريين وجدعنتهم وولاد البلد بتوع زمان ياريت يكون في كده الزمن ده
دومتي بخير

هبة النيـــــل يقول...

أستاذة نيفين

اهلا بيكِ

منوراني فعلا ربنا يكرمك

سعيدة أوي ان احساسها وصل

اصلي فعلا فعلا كان نفسي أعيش الحياة البسيطة دي

هبة النيـــــل يقول...

أستاذ Well

مرحبا بك :)

ربنا يكرمك والله

شكرا على طيب الكلام

سأنتظر "رأي ونقد" :)

هبة النيـــــل يقول...

القمر الباكي

ايوة "ولاد البلد" الجدعان

لسه فيه منهم

بس ماعادوش كتير

نفسي فعلا يرجعوا تاني

ونفسي نقعد في البيت ونبطل ننادي بالمساواه :)

ســـهــــر يقول...

مساء الخير
مبدئيا ينفع اقولك انى حبيتك اوى ؟

من احلامى العيشة الجميلة البسيطة دى
لما يحصلى حاجة حلوة الاقى جيرانى وحبايبى معايا ولو حصلتلى مشكلة الاقى الغريب قبل القريب واقف فى ضهرى مش واقف قدامى



على فكرة بوست بلاش ترحل رائع حد الجمال

القمرالباكي يقول...

السلام عليكم ورحمه الله وبركاته

صباح الخير دكتوره هبه
عامله ايه

ياريت تتوجهي لمدونتي لقبول التاج الي اهديته لكي

دومتي بكل الخير

أحمد الصعيدي يقول...

أين نحن من مان يستجدي المء فيه نخوة الرجولة



أسعدك الله

هبة النيـــــل يقول...

صباح الفل سهر

ربنا يحبك ياسهر

فعلا كان نفسي اعيش الايام دي

نورتيني وشرفتيني

هبة النيـــــل يقول...

القمر الباكي أنا متشكرة جدا ليكي عشان افتكرتيني في التاج

منوراني يا قمر :)

هبة النيـــــل يقول...

أستاذ أحمد الصعيدي

أسعدك الله يا فندم

نورتني :)

القمرالباكي يقول...

السلام عليكم ورحمه الله وبركاته

ازيك يادكتوره هبه فينك من زمان وحشتينا ايه وخدك عنا
يارب نشوفك قريب بعمل جميل من اعمالك
الرائعه
دومتي بخير

maxbeta3zaman يقول...

الله الله
صور جميله يا هبه
أنا بقى عشت هذه الأيام بالتفاصيل دى كلها وبالرواقه دى نفسها ولم يكن فى شارعنا كله سوى فرد واحد عنده عربيه ملاكى وله فيلا اسمها فيلا الجارحى لذا كان لعب الكرة الشراب ممكنا فى كل الشوارع الفرعيه وكانت كل الطقوس المذكوره فى سطورك شيئا ملموسا وواقعا عشناه ...ولك ان تتخيلى مدى حسرتنا على سلبيات الحاضر

أحــوال الهـوي يقول...

انتي فين يا دكتورة

واحشني وجودك و اشعارك وتعليقاتك

يارب تطمنيني عليكي

تحياتي

maxbeta3zaman يقول...

صور شعريه جميله لزمان عشنا بعضا منه فعلا فأنا من جيل لعب الكره الشراب ورأى الملايه اللف فى المنشيه والزنقه والقبارى ومينا البصل وعاصرت الشاى ماركة "الشيخ الشريب" وأكواب الشاى المذهبة الحافة والقلل فى البلكونات
وفعلا انت تفتقدين أشياء جميله وصفات فى الناس ليتها تعود
تحياتى لك لوصفك الرائع لأيام بالقطع لم تعيشيها ....لمكننى أعرفها ..فقد عاصرتها

عباس بن فرناس يقول...

كان نفسى اعيش ذمن الطربيش
كان نفسى يكون فى شارعنا شاوسش
ان شفته فى حلم ميخطفنيش
وان شافنى فى سكة ميضربنيش
يكسرلى الباب ولا يكسرنيش
ويسيب الحلم يطير بشويش بشويش
هذا مقطع من احدا كتاباتى سجلته هنا لاننى مندهش من سهولة تلاقى الفكار
اشعارك جميلة ورقيقة

أحــوال الهـوي يقول...

مازلت انتظر بزوغ نجمك من جديد

امل يحدوني و اؤمن بتحققه


تحياتي

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل