الاثنين، 22 سبتمبر، 2008

ساعات بحب حاجات

ساعات بحب حاجات
مايحبهاش غيري
وساعات ألاقي حاجات
شغلالي تفكيري
.
ساعات بحب السما
زاينها سحاباية
على طول الطريق
تمشي كدا معايا
واسرح فــشكل جميل
أو صورة جوايا
.
ساعات بحب الشجر
تبارك الخلاق
اهمسله وانا جمبو
اقوله أنا مشتاق
للمسة ..حنينة
تطفّي دي الاشواق
وحشتيني يا زهرة
يا زرعة خضراية
.
سعات ألاقي الشمس
تصبح على عيوني
بشعاع من نور عنيها
واغمز لها جفوني
ويا ابتسامة تبين ضي
...سنوني
صباحك فل
ياأحلى شمساية
.
ولو هقول ع القمر
ما يكفيهوش أشعار
لما أبص عليه
أقوله أنا محتار
أوصف جمال خدك
وللا نورك...
دا باينه نهار
مسايا نوَّر بيك
يا أحلى قمراية
.
حتى سعات ألمح
في الطريق أطفال
تلعب في الرملة
أحاول أبعدهم
بس عن الأخطار
يكفيني ألمح ضحكة
صافية فعيونهم
تحيي قلبي وتدفي
روحي جوايا
.
واسرح كتير في حاجات
تشغل لي تفكيري
وسعات أحب حاجات
مايحبهاش غيري
.
.
شكر خاص للباشمهندس MB
كتب عنوانها وعجبني
ولم أكن أعرف أنه عنوان أغنية
إلا بعد كتابتها

هناك 13 تعليقًا:

حبارير - السعادة - انطلاقة يقول...

محجوز

راجع

انسانةعادية فى عالم مش عادى يقول...

السلام عليكم ورحمة الله وبركاته يادكتورة هبة
ثانيا بجد روعة تسلم ايديكى تعرفى احساسك عالى جدا وبجد كل مااقرا اللى بكتبيه بحسه اوى اوى
تسلم ايديكى يارب وربنا يكرمك يارب

radwa يقول...

بحب حاجات مايحبهاش غيري
فى الرايحه والجايات بغني مع طيري
ده اللى قاله منير

واللى قالته هبة النيل
ساعات بحب حاجات مايحبهاش غيري
وساعات الاقى حاجات شغلالى تفكيري



ساعات بحب السما
زاينها سحاباية
على طول الطريق
تمشي كدا معايا
واسرح فــشكل جميل
أو صورة جوايا
*****

صوره حبيب مجهول
او ورده ونسمايه
تعدي من بين ضلوعي
وتفضل ساكنه جوايا
ومن وقت للتانى تهزنى
وتصبنى برعشايه
رعشايه جميله وهاديه
مع بسمه وذكرايه
حلوة كانت او مره
اهى ساكنه جوايا


تحفه والله يا رورو
ايه يابنتى الابداع ده
هو الصيام بيطلع كلام حلو كده

راجعالك تانى على فكره

روحى خدي الكلمه اياها من الفيديون بقى (:

حبارير - السعادة - انطلاقة يقول...

لا

هامشى انا بأه

آية ورضوى ولسة الباشمهندس

ما شاء الله ربنا يحفظكم جميعا آمين

الحتة بتاعة الشمس دي رسمتيها في زجلاية تانية رسمة فيها حاجة مبدعة مع اللي هنا بس مش فاكر الزجلاية دا اللي أخرني

حبات القلوب دي مدونة أخي له محاولات في الزجل وضعته في مدونات صديقة عندي

خوفك على الأطفال لفت نظري أوي

دمت بكل خير

هبة النيــل يقول...

إنسانة عادية

إنتي اللي جميلة ومرهفة الحس فعلا

ربنا يكرمك يا رب

بتنوريني

هبة النيــل يقول...

حبيبة قلبي رضوى

ربنا يكرمك على الكلام الحلو دا

بس والله ماعرف إنها أغنية

يا بنتي انتي عارفة مستوايا آخره "بعرور "


مبسوطة جدا إنها عجبتك

هبة النيــل يقول...

أستاذ حبارير

يا حلم مستني اللؤى

يا شمسة ساطعة مشقشقة

هي دي؟؟؟

منورني يا أستاذ حبارير والله

حبارير - السعادة - انطلاقة يقول...

يا حلم مستني اللؤى

يا شمسة ساطعة مشقشقة

دي كمان تحفة

تبارك الله

سأبحث عنها و...
سآتي بها بإذن الله

بس بجد يا دكتورة تسلمي

هبة النيــل يقول...

مش دي كمان؟؟ :)

طيب

ربنا يكرمك يا أستاذ حبارير

على تشجيعك

عاشقة القمر يقول...

مدونتي جميل تسلمي اختك عاشقة القمر من السودان

هبة النيــل يقول...

أهلا أهلا أختي الكريمة عاشقة القمر

منورة الدنيا يا قمر

a7wal el Hawa يقول...

هذا ما نسمية بالشفافية
حينما ينبعث ما بداخلنا من اشياء قد تكون لها علاقة بذكرىات ما خاصة بنا سواء كانت سعيده او مؤلمة فاننا نراها كما لا يراها الاخرون
لهذا ساعات بنحب حاجات ما يحبهاش غيرك

تحياتي

هبة النيــل يقول...

كل دا؟؟؟

:)

شكرا يا فندم على الإطراء

بس على فكرة

فعلا دي حقيقة بتحصلي

بصبح ع الشموسة

لما بتصبح على عيوني بشعاع نورها

وأحب السما والقمر

حتى الأرض عاشقاها

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل