السبت، 27 سبتمبر، 2008

وشوشة حلم

بحلم أنا بحارة
وناس كتير زحمة
وبيت بسيط فيها
دافي كدا بـ"رحمة"
اللبس "جلابية"
والكلمة "يا عنيّة"
والقعدة ع "المسطبة"
والأهل همّا الجيران
محلاها دي الـ"لمّة"
العفش لا بألافات
ولا عمري أقول له هات
على أد "مصروفنا"
هتكون بأه عيشيتنا
النفس مرضية
والعيشة دي هنية
يمكن نكون احنا
بنعقد الدنيا
==
مالها عيشيتنا زمان
ما كان ماليها أمان
ولا حد مش عاجبه
عيشته بأي مكان
الست زاينة الدار
وراجلها دا سندها
في شغله طول النهار
وهية مع اولادها
يرجع لبيته يلاقيها
طبخاله بإيديها
والفرح ماليها
والبيت طمان وأمان
"سكنة" نعيش "بيها"
والود ...سُكَّرهم
للعيشة "محليها"
بعد الغدا يرتاح
والعيال ...ولا حس
ويذاكروا واجباتهم
عيال كدا "بتحس"
بعد التأييلة يقوم
يقعد مع عياله
بضحكة ينسوا الهموم
وهما "راس ماله"
==
آدي لمة العيلة
وآدي السكن والحب
ودول هما أم وأب
وآدي يا ناس وشوشة
بحلمي اللي ماليني
بحاول أحيا فيه
بكلمة تكفيني
حلم وياريته يكون
حقيقة ترضيني
بحلم أكيد والحلم
طيفه بيحييني
باحلم.....

هناك 20 تعليقًا:

tarek momen يقول...

يابنتي انتي فعلا بتوصفي حياتنا اللي عشناها زمان
طب ياتري انتي عيشتي الحياة دي و لا بتوصفيها علي السمع؟؟؟؟؟

هبة النيــل يقول...

ههههههههههههههههه

أستاذ طارق أنا 30 سنة

نص سمع من جدي ونص خيال بتوقع يكون شكلها ازاي العيشة ...على أفلام أبيض واسود

على مسلسلات هذه الحقبة أيضا

يعني

يمكن أفكار مختزنة يا فندم

منور

انسانةعادية فى عالم مش عادى يقول...

تسلم ايديكى يادكتورة والله المدونة بتاعتك بتحسسنى ان الدنيا لسه بخير
فعلا احساسك بيخلى الانسان يسرح فى ايام زمان كل سنة وانتى طيبة وعيد سعيد عليكى يارب

elsha3er يقول...

الله عليكى الكلمات جميلة والمدونة دمها خفيف جدا جدا وباين كدة انك بتحبى ايام زمان وبساطتها فى العيشة وانا معاكى ليت الزمان يعود يوم انا بحب جدا الاماكن القديمة اللى فى القاهرة على فكرة انا من الاسكندرية بس بحب جدا احياء الحسين وخان الخليل والحاجات الشعبية اللى زى دى عشان بنحس فيها بطيبة واصالة بجد تحياتى


احمد الشاعر

هبة النيــل يقول...

انسانة عادية

انتي اللي احساسك جميل عشان حسه الكلمات

كل سنة وانتي طيبة يا حبيبتي

بتنوري الدنيا

هبة النيــل يقول...

الشاعر

اهلا اهلا يا عم "نجم" الصورة منورة:)

انت واخد صورة الفاجومي اللي كلنا بنموت فيه وفبساطة اشعاره

منور الدنيا يا فندم

انتظرني عندك

يسرا يقول...

راائعة كما انت دائما

كنت أظنك أكبر من عمرك بكثير لصدق وصفك لـ(زمان) وكأنك عشتيه بكل تفاصيله
لكن هكذا دائما الشعراء

كل عام وانتم الى الله اقرب

عيد سعيد ان شاء الله

Mohamed Hamdy يقول...

طب والله بجد إشتقت فعلا اسكن فى حارة بسيطه مفيهاش تعقيد الحياه الصعبه بتاعتنا

لو معندكيش مانع فى اننا نتراسل على الايميل ممكن تبعتيلى رساله على ايميلى

انا ايميلى

mohamedhamdyonline@gmail.com

لانى بحثت عن ايميلك ولم اجده.. وطبعا لو متحبيش دى حريه شخصيه

تحياتى

هبة النيــل يقول...

الراقية يسرا

حمدا لله على سلامتك

تقبل الله منا ومنكم حبيبتي

شكرا لكِ على الاطراء

هبة النيــل يقول...

أستاذ محمد حمدي

أولا منور المدونات

وتشرفت جدا بمعرفة حضرتك

مع الاعتذار عن قصة الايميل

لكني فعلا متشرفة جدا بحضرتك

حبارير - السعادة - انطلاقة يقول...

انا جاي لأعتذر عن تأخيري

آسف يا سيدتي

للزجل رائحة السنين

من داخلك

تتشذى...تلك العطور

وأرى أبي..

وأمي...

وجدي

وبيت صغير

على ضفة النهر يرقد

وينتظر السابلة

وفي مقلتيه

ينام الأصيل

ولا تغرب الشمس إلا

بروح الرضا

ولا تطلع الشمس إلا

بعطر الندى

وفي الليل ناي

وشاي الركايا

على باب ستي

تدور الحكايا

ويكبر حبي

عاما فعاما

a7wal el Hawa يقول...

عاجبني احساسك و قناعتك
حقيقي البساطة سعادة و الدنيا محتاجة ناس يسايروها و يعدوااحزنها و مشاكلها ينسوها
تسلم ايدين تبني و تزين العيلة
و راضية بالمقسوم و حلمها ليلة
تعيشها لاولادها و جوزهاو لدارها
و امانها راس مالهاوالستر للعيل
تحياتي

هبة النيــل يقول...

باشاااااا

أستاذ حبارير

دائما نتتظر ردك المميز

لكن بجد بجد

ماهذا الرقي

مميز أنت أستاذ حبارير

أرق المنى

هبة النيــل يقول...

الأستاذ أحوال الهوا

الله

جميل جدااا ردك

وفعلا أنا مقتنعة إن بإيدينا سعادتنا

بس احنا اللي غاويين غلب:)

تشرفت بيك حقيقي

د/ رامي شهاب الدين يقول...

حلمك حلم جميييييل

ووصف الحلم روعة

بجد أبدعتى

دمتى بكل خير..تحياتى

هبة النيــل يقول...

د.رامي


نورت حلمي :)

Wael يقول...

بحلم وحلمى بسيط .. كلنا نحلم حلم العودة بالزمن الى الوراء .. زمن الخير .. يارب الحلم يتحقق بصورة او باخرى .. جميله القصيدة كالعادة يا دكتورة

romansy يقول...

ايه الكلام الجميل دا
والله احلامك بسيطه
وجميله وكلامك جميل قوى

هبة النيــل يقول...

باشمهندس وائل باشا

أهلن أهلن

منوررر

ياريته ينفع يتحقق

هبة النيــل يقول...

الأستاذ رومانسي

منور الدنيا أوي

ربنا يكرمك

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل