الاثنين، ١٥ فبراير ٢٠١٠

دستة مناديل

صحيت على شمسه زاينه شروق
على الديك لما بينادي
وزي العادة أبص لفوق
أصبّح على شعاع هادي
بفرحة أقول نهار نادي
صباحي اليوم دا غير عادي
هجهز نفسي لمعادي
مع الأحباب
ودق الباب
ودقات قلبي من سرعتهاخلته داب
بصوت عالي نده أخوية
دا سي حمدي
واد عمي وجاي يفطرمعانا اليوم
من الفرحة لقيت نفسي
لا قادرة أمشي ولا اقدر اقوم
وأمي عليّه بتنادي
تعالي يا فاطنة ساعديني
حاضر يامّا من عيني
بـ رَبكة أزبّط المنديل....
على راسي
وأتنفس نفس جامد
بحاول أداري احساسي
وجري على أمي في المطبخ
دا طبقين فول
وبيض زبدة
عسل أسود مع طحينة
وجبنة أكيد.. يعني قديمة
وادي الجرجير زاهي خضار
شرايح طماطم ويّا خيار
- تمام يامّاهروح أودي لـ سي حمدي
بضحكة لئيمة عليّه أمي ترد تقول
مفيش غيره اللي هيفطر؟
- يامّا بتكسفيني أكتر
وفي المرواحة طبق واحد
لاجل ماانول كذا نظرة
وانا خدودي تزيد حُمرة
بلمحة عينه لعنيّه
وألاقي لهفته عليّه
تزيد حبة في المرة
اتفضلوا الفطور جاهز
تلملمهم حواليها طبلية
ينادي أخوية متزربن
يا فاطنة ياختي فين العيش
بلؤم أمي ترد تقول"اللي واخد عقلك"
وجري أروح أودي العيش
وبعد الشاي دخلت أوضتي
أتسنط على قوله
وكل كلام بيقوله
عسل سكر
ومن بوئه يزيد أكتر
لقيته خد أخوية على جنب
هجيكو على ندهة المغرب
أنا وابوية...
وانا لا زواق ولا بوية
.......استنيت
الله أكبر
ندهة إمامنا في الجامع
....على المغرب
وصاحبه خبطة الأحباب
على قلبي ...دي مش عالباب
دخلت أمي بتساير مرات عمي
نادوني يا فاطنة الشربات
ودقات قلبي طبول زفة
مافاكر غير فرحته بحمدي
كأنه ماشافش يوم زعلة وللا أهات
مرات عمي هادتني
بـ دستة مناديل
قالتلي هديتك يا جميل
من حمدي
جريت على أوضتي وسريري
وخدت في حضني مناديلي
وعلى صوت كارم محمود
دستة مناديل .. حلوين يا جميل
أستنظر..يحين فرحي
وأنسى معاه ..أوام جرحي
وأنسى الدنيا كلتها
ولا افتكرش إلا زينتها
دا "سي حمدي"

هناك ١٠ تعليقات:

أحــوال الهـوي يقول...

حمد الله علي السلامه

طال الغياب و فضل من ربنا انك بخير

و مع روعة عودتك تهدي لنا دستة مناديل و فيها رائحة الحارة المصرية ببساطتها و حمرة خجل صباياها و غزل عفيف ينعيش قلوب الحياري
و لمحه من وداد نادي لقلب رهيف

التصوير الرائع لدقالامور حتي اني احسست بنبضات قلب فاطنه من الفرحه و الشوق و الامل


شكرا لك عطرتي صباحي يا دكتورة
بلاش غياب تاني ربنا يسعدك و يكرمك

تحياتي

هبة النيـــــل يقول...

أهلااااان

الله يسلم حضرتك يا دكتور

ربنا يبارك فيك يا رب

شكرا يا فندم على الرد "الأنيق"

أسعدني ردك جدا والله

أعطر التحايا

أحــوال الهـوي يقول...

هبة النيـــــل
اهلا و اشرقت الانوار برجوهك البهي
دكتورة
الموضوع فيه لغة حوار بين شخص و حبيبته
فبدأ بقالتللي
اذا كل ما قيل تحتها قول المحبوبه
و خليني علي شوقك(انت) حنين فاكر ومش ناسي


و لما بدا بقلتلها
قلتلهــــا بس قلبـــي وحيد طواه الشوق
و هذا شعور المحب

اسف اذا كانت اللغه الحواريه غير و اضحه

شرفتيني بزيارتك بعد طول غيبة فانت من الشعراء الذين اعتز بهم

تحياتي

tarek momen يقول...

عدتي و العود احمد
حمالله علي السلامة يا هبة النيل
الأبيات جميلة و مفرطة في الشعبية
لي ملحوظة لم يعجبني وصف الراوية لنظرة امها باللؤم
مش عارف ليه حسيت انها ثقيلة بعض الشئ
تحياتي

هبة النيـــــل يقول...

أستاذي الفاضل طارق

لك حق العتب ربما لم أوفق فيها

ولكنني أقصدها ضحكة لئيمة كمزاح الأمهات وليس لؤم بمعنى خبث

أردت توصيلها وربما خانني التعبير

هل لك استاذي اقتراح بكلمة بديلة

هتصدقني لو قلت لحضرتك

إن حضرتك أول مدونة دورت عليها

حقيقي سعدت بتواجد حضرتك

فحضرتك والد غالي

دمت بود

عفوا أنا أميرة يقول...

طبعا عارفة رأى فى الزجل الجميل دا، لما قريتها علىالايميل عجبتنى جدااا احساسها عالى قوى...تسلم يمناكِ

فشكووول يقول...

ازيك يا هبه
يا ريتنى كنت سى حمدى .. يا سلام يا بختك يا سيى حمدى

واد ... واد ... كدا بصحيح

تحياتى

فشكووول يقول...

على فكره صحيح هى عبقرى انت مش بتشتغل ليه والتعليقات مش بتشتغل خالص

هبة النيـــــل يقول...

الأميرة سلمى

بتنوريني

ورأيك دايما يهمني

:)

هبة النيـــــل يقول...

عموفشكوووووووووووول

منور والله العظيم فعلا :)

حمدي دا بابايا :)

أصلو فتى أحلامي

:)

بس الحمدلله ربنا رزقني بابن الحلال فعلا ابن حلال :)

بس طول عمري بحب أبوية أعمل ايه

هههههههههه

دا من خيالات أفكاري :)

منورني جدا يا عمو

وحضرتك لما حطيت صور أحفادك

فكرتني ببابا

عمل لبنتي نتيجة عليها صورتها ووزعها هههههههه

ربنا يراضيك ويسعدك ياااارب :)

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل