الخميس، 15 مايو 2008

عروسة زمان



نفسي يعود بيا الزمان


نفسي اعيش أيام زمان


تنزل ضفايري مالمشربية


أمي تنادي كدا هو عليّه
يابت... ايه موقفك في المشربية؟؟؟
يامّا ... أنا بس بسقي القلتين
على الله ابوكي يلمحك ...
توك هيجي يدبحك....
واخطف دقايق ورا مواربة المشربية
لا حد يلمحلي عيون...
ولا حد يعرف شكلي ايه..
غير لمّا يتكلم عليّه
أطلع يدوب فوق السطوح
ومعايا حبتين غسيل جوا السبت
أأكل فراخ ... أزغط حمام
وساعت الطبيخ
أعمل مع أمي محشي...
ببقدونس ويّا الشبت
ييجي أبوية ساعت الغدا...
نقعد ونتلملم سوا
طبلية واسعة كايده العدا
ولا حد ينطق الهوا
ينده أبوية بعد الغدا...
يا بت ...فين الشاي
حاضر يابا لبّه الندا
توك أهوت جاي
يشرب ويتمزج أوي
يابت ازاي أتحرم
أشرب يوماتي منك شاي
ليه يابا بتقوللي كدا
امشي يابت من هنا
أبوكي عوزني فكلمتين
حاضر (يانهار الهنا)....
ياما نفسي يطلعو كلمتين
من اللي فــدماغي أنا....
أطلع لبره .... فكريني مشيت بعيد
أتاريني وقفالهم هناورا باب أو ضتهم..
أسمع كلامهم ...
يمكن يكونوا كلمتين
من اللي فــدماغي أنا...
قال أبوية لامي ... البت كبرت
والنهارده جاني عريس...
قامت امي من فرحتها بيّه..
....هللت ...
...وزغردت....
أبوية قالها يوليّه...
كدا البت عينها اتفتحت...
تسمع باللي يجرى بيننا
يخويا دا نهار الهنا....
أما اجري اقول لام السعيدوام ايمان
بردو جيراننا من زمان
نفرح سوا .. نزعل سوا
تنادي أمي عالجيران
تعلي صوت زراغيتها
خير يختي يا أم حنان
بنتي حنان جالها عريس
والجمعة الجاية ... دخلتها
يختي يانهار الهنا.....
عقبال عيالي أنا....
وعلى ما ييجي الخميس
أمي تجهز اتواب القماش
دا حرير ...ودا دنتي
لوفستان الزفاف...
ومن فرحتي بـــ دا العريس
أنسى اسأل امي أبسط سؤال...
...."اسم العريس"
يللا ... وبايه يهم...
أنا عروسة ... ودا المهم
هبأه اعرف بأه اسم العريس..
..."بعد الزفاف"..!!!!

هناك 5 تعليقات:

عكـــوة يقول...

أولا حمد الله ع السلامة

ثانيا مبروك ع العريس

ثالثا جااااااااامدة بجد

رابعا بقى عايز أقول ان فكرة المدونة جميلة جدا جدا جدا

هبة النيــل يقول...

منور يا عكوة دايما

ربنا يباركلك ابقى زورني كتير وقوللي رأيك بصراحة

لسه بجدد فيها

wael يقول...

المدونه كلها رائعه يا دكتورة ..

هتاخد وقت لغايه ما اخلصها ان شاء الله

بس مش هسيبها (:

عروسه زمان بقى تحفه وابداع متعودين عليه ..

متابع حضرتك ان شاء الله

wael يقول...

المدونه ككل اكثر من رائعه

بحب جدا ارجع بالزمن الجميل ايام المشربيه والحارة والجدعنه والهدوء النفسي

تصيم تحفه وتعليقات وصور رائعه

هلف ان شاء الله فيها حته حته مش هسيبها

عروسه زمان بقى لينا فيها كلام تانى ان شاء الله بس مش جديد الابداع على حضرتك

radwa يقول...

لا بجد راااااااااااااائعه
كانت فى المدونه دي تايهه عني ؟؟

وش بيخبط راسه فى الحيط

أوا

حارتنا

حارتنا مليانة جمال....بس يمكن عنينا مش شايفاه...
يابن بلدي حبها علشان تحبك...
ولازم تفرق بين بلدك وبين اللي ماسكينها...

أختك وبنت بلدك

هبـــــــة النيــــل